Захирлын мэндчилгээ

Зүүн бүсийн Дорнод их сургуулийн эрдэмтэн багш  нар, ажилтан ажиллагсад,  оюутан, суралцагчдын нэрийн өмнөөс Та бүхний амар амгаланг эрэн мэндчилье.

Манай хамт олон хувь хүний чадамжид суурилсан сургалтын хөтөлбөрийг хөгжүүлэх, мэргэжлийн ёс зүй, хариуцлагыг эрхэмлэн, багшийн хөгжил, хүний хөгжлийн орчинг дэмжсэн судалгаанд суурилсан их сургууль болох зорилгыг дэвшүүлэн Бүс нутгийн нийгэм, эдийн засгийн хөгжлийг манлайлагч, шилдэг судлаач, бүтээгчдийг төрүүлнэ гэсэн эрхэм зорилго, Зүүн хойд Азийн нээлттэй их сургууль болох алсын хараандаа хүрэх хөгжлийн төлөвлөгөөгөө хэрэгжүүлэн ажиллаж байна.

Төрийн өмчийн их сургуулийн бие даасан байдлыг хангаж, хөгжлийн эрэлт хэрэгцээнд баримжаалсан мэргэжилтэн бэлтгэх, стандартад суурилсан чанарын хяналтын бодлого, төлөвлөлтийг нэвтрүүлэн цахим болон танхимын хосолсон  хэлбэрээр сургалтын  үйл ажиллагааг удирдан зохион байгуулж байна.

Нийгмийн бүх салбарт гарч буй өөрчлөлтөд нийцсэн ур чадварыг дэмжих боловсролын шинэ хэлбэрт нийцүүлж хувь хүн өөрийгөө үр дүнтэйгээр хөгжүүлэх, тодорхойгүй нөхцөлд уян хатан зохицох, үр бүтээлтэй хөдөлмөрлөж, тогвортой сайхан амьдрахад  мэргэшлийн ур чадварыг хэрэгжүүлэх ур чадварыг хөхиүлэн дэмжих сургалтын арга зүйг түгээн дэлгэрүүлэхэд санаачилга гарган ажиллаж байна.

Бид үе үеийн багш нар, эрдэмтэн судлаач, ажиллагсдынхаа нөр их  хөдөлмөрийн үр дүнд бий болсон ололт амжилт, баялаг туршлагаа улам баяжуулж, Дорнод, Хэнтий, Сүхбаатар аймаг, түүний сумдын ЗДТГ, БСУГ, төр, төрийн бус байгууллага, аж ахуйн нэгж байгууллагууд, хөрш орнуудын хил залгаа бүс нутгийн их сургуулиудтай хамтын ажиллагааны гэрээ байгуулан хамтран ажиллаж оюутан залуусыг чадварлаг, хүнлэг энэрэнгүй, ёс зүйтэй боловсон хүчин болгон бэлтгэх эрхэм үүрэг зорилгоо биелүүлэхийн төлөө нягт хамтран ажиллаж байна.

Төрийн өмчийн, Магадлан итгэмжлэгдсэн, Зүүн бүсийн Дорнод их сургуулийг сонгон суралцаж, эрдэм шинжилгээ, судалгааны чиглэлд хамтран ажиллахыг урьж байна.

ХҮНДЭТГЭСЭН

ЗАХИРЛЫН ҮҮРЭГ ГҮЙЦЭТГЭГЧ Э.УНДАРМАА